Normas xerais para a proba de certificación

A proba de certificación

• Requisito de acceso: ter mínimo de 16 anos de idade.
• Está dispoñible tanto en galego como en castelán, de xeito que a persoa usuaria poderá seleccionar o idioma no momento de realizar a proba.
• Consiste nun cuestionario composto por entre 60 e 70 preguntas de diferente complexidade que inclúe a avaliación das 21 competencias establecidas na estrutura do Marco Galego ComDix.
  • Tipoloxía de preguntas: pregunta simple, múltiple, arrastrar, relacionar…
  • Non haberá penalización polas preguntas incorrectas.
  • Para a proba disporase dun tempo máximo de 90 minutos. A interface amosará en pantalla o tempo de exame restante. Se algunha persoa candidata non acabase a proba no tempo establecido, esta será entregada automaticamente para a súa corrección.
• Considerarase apta aquela persoa que supere o 70% das preguntas totais. Ademais, débese superar o 60% das preguntas referentes a cada unha das 5 áreas nas probas para a certificación de nivel iniciación e intermedio.
• Unha vez que cada persoa candidata finalice a súa proba poderá coñecer a puntuación da mesma, o seu resultado (apto/a ou non apto/a) e coñecer as preguntas erradas.
• Non se autoriza o uso de dispositivos electrónicos nin de ningún material adicional durante o desenvolvemento das probas de certificación.
• As persoas con discapacidade legalmente recoñecida poden pedir, na solicitude de inscrición, a adaptación ou adecuación do tempo e dos medios materiais necesarios para a realización da proba.

Correccións e reclamacións

As persoas que estean en desacordo co resultado obtido na proba, poderán reclamar, no momento de visualizar os resultados, empregando o formulario dispoñible para tal efecto. Esta reclamación poderá ser por pregunta fallada ou xeral. A información sobre o proceso, así como a súa resolución, srán remitidas por correo electrónico.

Ao saír da contorna da proba, non hai opción de visualizar as preguntas erróneas nin de realizar unha reclamación.

Non asistencia á proba

Se non se acode á proba por algún motivo, a persoa usuaria consumirá esa convocatoria.

Se o motivo da non presentación fose xustificado, deberá enviar o xustificante correspondente a competencias-dixitais@xunta.gal. 

Consideraranse causas xustificadas: accidente, hospitalización, nacemento ou adopción, morte dun familiar ata o segundo grao de consanguinidade ou primeiro de afinidade, obrigacións de carácter público ineludibles e outras que presenten igual carácter excepcional.

A persoa usuaria non poderá inscribirse nunha nova proba nun prazo de doce meses no caso de non presentación á proba sen xustificación ou dun incumprimento grave das normas, independentemente do tipo de certificación. Considéranse incumprimento grave das normas:

• Uso de material de estudo, acceso a páxinas web non permitidas ou utilización doutros recursos que supoñan unha axuda non permitida á hora de responder as preguntas da proba.
• Anotación ou captación das preguntas da proba que poidan filtrarse posteriormente a outras persoas.
• Calquera comportamento sospeitoso que supoña un intento de copia ou fraude identificado pola persoa coidadora da proba.